সময়ৰ সোঁতত টকাৰ মূল্য

সৰুতে নিয়মিতভাৱে চান্দমামা পঢ়িছিলো৷ সময় আশী দশকৰ প্ৰথম ভাগ৷ দেউতাৰ লগত যাওঁ এতিয়া অতীত হোৱা  ‘পুথিঘৰ’ নামৰ লখিমপুৰ চহৰৰ গ্ৰন্থ বিপণীখনলৈ৷ এই মাহৰ চান্দমামাখন আহিল নেকি বুলি সোধা প্ৰশ্নৰ উত্তৰত ভূঞা খুৰাই মূৰ দুপিয়ালে যি পুলক অনুভৱ কৰিছিলো, তাক আজিও পাহৰিব পৰা নাই৷ এই লেখাটোৰ পৰিকল্পনা কৰোতে হঠাৎ মোৰ মনলৈ অহা শব্দ দুটা আছিল ‘হেজাৰপতি’ আৰু ‘লাখপতি’৷ যিমান দূৰ মনত পৰে শব্দ দুটাৰ সৈতে চিনাকি হৈছিলো শিশু গল্প আলোচনীখনৰ পাততেই৷ কোনো গল্পত দুজন অৰ্থৱান মানুহক বুজাবলৈ কৰা বৰ্ণনাৰ অংশ আছিল এই বিশেষ্য দুটা৷ হেজাৰপতি অৰ্থাৎ হেজাৰ হেজাৰ টকাৰ মালিক৷ লাখপতি অৰ্থাৎ লাখ লাখ টকাৰ মালিক৷ লাখপতি বাৰু যেনতেন, হেজাৰপতিক আজিৰ যুগত নিশ্চয় অৱস্থাপন্ন বুলি আখ্যা দিব নোৱাৰি৷ হেজাৰ টকা শেষ হ’বলৈ কিমান পৰ? হয়তো তাহানিৰ হেজাৰপতিৰ স্থান আজিৰ লাখপতিয়ে ল’লে আৰু তাহানিৰ লাখপতিৰ স্থান ল’লে আজিৰ কোটিপতিয়ে৷

চেম্বাৰত মোৰ মুখামুখিকৈ বহি থকা ৩০ বছৰীয়া ব্যক্তিজনে ৬০ বছৰ বয়সত অৱসৰ ল’ব খোজে৷ তেওঁৰ প্ৰয়োজন এটা অৱসৰ পৰিকল্পনাৰ৷

ঃ আপোনাক ৬০ বছৰ বয়সত কিমান টকাৰ প্ৰয়োজন হ’ব বুলি ভাবে, যিখিনি টকাৰে নেকি আপুনি আজীৱন অসুবিধা নোপোৱাকৈ চলি যাব পাৰে? যুৱকজনৰ প্ৰয়োজনৰ প্ৰতি থকা ধাৰণাটোক বুজিবলৈ প্ৰশ্নৰ অৱতাৰণা কৰিলো৷

: এক কোটিমান লাগিব কিজানি৷ আপুনি কি কয়? যুৱকৰ উত্তৰ আৰু প্ৰতিপ্ৰশ্ন৷ অনুমান হ’ল তেওঁ বিশেষ নভবাকৈ সংখ্যাটো মুখত লৈছে৷ কাৰণ কোটি এতিয়াও বহু টকা৷ সেয়ে কোটিৰ এতিয়াও এটা  ৰোমাণ্টিক আবেদন আছে৷

: চাওক, ২০১৫ চনৰ এক কোটি আৰু ২০৪৫ চনৰ এক কোটি একেই নহয় কিন্তু ৷ মুদ্ৰাস্ফীতিৰ বাবে টকাই নিজৰ ক্রয় ক্ষমতা হেৰুৱায়৷ ৩০ বছৰৰ পিচৰ এক কোটি টকাক আজিৰ মূল্যত চাবলৈ হ’লে আমি মুদ্ৰাস্ফীতিক গণ্য কৰিব লাগিব৷ ধৰক সন্মুখত থকা সমগ্ৰ ৩০ বছৰত গড় হিচাপে মুদ্ৰাস্ফীতিৰ হাৰ যদি ৮ শতাংশ হয, তেন্তে ২০৪৫ চনৰ এক কোটি টকাৰ বৰ্তমান মূল্য হ’ব প্ৰায় ১০ লাখ৷ অৰ্থাৎ আজিৰ ১০ লাখ টকাৰে যিখিনি দ্ৰব্য আৰু সেৱা কিনিব পাৰিম, ২০৪৫ চনত একেখিনি দ্ৰব্য আৰু সেৱা ক্রয় কৰিবলৈ এক কোটি টকা লাগিব৷ এতিয়া আপোনাৰ প্ৰয়োজনীয়তাৰ দিশৰ পৰা চাবলৈ গ’লে প্ৰশ্নটো হ’ব এনেকুৱা – আজিৰ ৬০ বছৰীয়া মানুহ এজনৰ হাতত দহ লাখ টকা তুলি দিলে যি স্বচ্ছন্দ্যতাৰে অৱসৰ জীৱন নিৰ্বাহ কৰিব পাৰিব, তেনে আৰ্থিক মানৰ জীৱন যাত্ৰা আপোনাৰ কাম্য হয় নে নহয়?

একেলগে দীঘলীয়াকৈ কথাখিনি কৈ উত্তৰ বিচাৰি যুৱকজনৰ চকুলৈ চালো৷ যুৱকৰ চকুত আশ্বৰ্যৰ প্ৰতিফলন৷ তেওঁ যেন বিশ্বাসেই কৰিব পৰা নাই ২০৪৫ চনৰ এক কোটি আৰু ২০১৫ চনৰ ১০ লাখৰ মূল্য সমান বুলি আগবঢ়োৱা মোৰ ব্যাখ্যা৷ সাধাৰণতেই এনে হয় আৰু সেইবাবেই মই গুৰুত্ব দিওঁ প্ৰথমে পৰিকল্পনাক৷ তাৰ পিচতহে বিনিয়োগ৷ ভৱিষ্যৎ দিনৰ টকাৰ সংখ্যা এটা যথেষ্ট হ’ব বুলি আধাৰবিহীনভাৱে অনুমান কৰি আগবঢ়া বিনিয়োগে আপোনাক চৰম শ’লঠেকত পেলোৱাৰ সম্ভাৱনা প্ৰবল৷ তাতে অৱসৰৰ পৰিকল্পনা৷ মানুহ এজনে উপাৰ্জন কৰি থকা দিনবোৰৰ কথা অলপ বেলেগ৷ প্ৰয়োজনৰ টকা কমিলে বেলেগ উৎস বা উপাৰ্জনৰ পৰা আনি কম হোৱা টকাখিনি মিলাবলৈ সুবিধা থাকে৷ বৰ প্ৰয়োজনত ধাৰো কৰিব পাৰি৷ অৱসৰৰ পিচত কিন্তু গোটেই কথাবোৰ সুকীয়া হৈ যায়৷ কাৰণ ধন প্ৰৱাহ আগৰ দৰে হৈ নাথাকে৷ সেয়ে ‘টকাৰ সময় মূল্য’ ধাৰণাটোৰ পৰা সম্ভাব্য মুদ্ৰাস্ফীতিৰ গাত ভেজা দি সেইটো কোন চনৰ টকা আৰু তাৰ বৰ্তমান মূল্য কিমান তাক জানিবলৈ বিনিয়োগ কৰাৰ পূৰ্বেই যত্ন কৰা উচিত৷

প্ৰিয় পাঠক, সামগ্ৰিকভাৱে অৱসৰ পৰিকল্পনাৰ কথা আলোচনা কৰাটো আজিৰ উদ্দেশ্য নহয়৷ কিন্তু এই টকাক সময়ৰ ভিত্তিত মূল্যায়ন কৰিবলৈ নজনাটো যে কিমান বিপজ্জনক হ’ব পাৰে তাক উপলব্ধি কৰিবলৈ আপোনাক হেঁচুকি দিয়াটোৱেই মোৰ লক্ষ্য৷ এইবাৰ আহকচোন অন্য এটা দৃষ্টিকোণৰ পৰা ‘টকাৰ সময় মূল্য’ চাবলৈ যত্ন নকৰা বিনিয়োগ পদ্ধতি এটালৈ চকু দিওঁ৷ বয়সস্থ লোকসকলৰ মাজত বেংক ফিক্সড ডিপ’জিট জনপ্ৰিয়৷ দেখিছো, বহু বয়সস্থ লোকে পৰিকল্পনা কৰে ফিক্সড ডিপ’জিটৰ সুতেৰে মাহেকীয়া খৰচ চলাই নিবলৈ৷ ধাৰণা – সুতখিনি খৰচ কৰিম আৰু মূলখিনি মূল হৈ ৰৈ যাব৷ মোৰ মাও এই ধাৰণাৰ উৎসাহী প্ৰবক্তা৷ ধাৰণাটোক পৰীক্ষাগাৰলৈ আনো আহক৷ ধৰক ৬০ বছৰীয়া ব্যক্তি এজনৰ ৩০ লাখ টকা আছে৷ তেওঁৰ অৱসৰকালীন জীৱনৰ খা-খৰচৰ বাবে এই টকাখিনিক বাদ দি অন্য কোনো সম্বল নাই৷ তেওঁৰ পৰিকল্পনা – এই ৩০ লাখ টকাৰ ফিক্সড ডিপ’জিটৰ পৰা আহৰণ কৰা সুত মাহেকীয়াকৈ খৰচৰ বাবে ব্যৱহাৰ কৰিব৷ এনে কৰিলে ৩০ লাখ টকাৰ ৮ শতাংশ হাৰত বছৰি সুত হ’ব ২ লাখ ৪০ হেজাৰ টকা৷ অৰ্থাৎ আমি থূলমূলকৈ ক’ব পাৰো যে তেওঁৰ ছেভিংছ বেংক একাউণ্টত মাহিলি ২০ হেজাৰ টকাকৈ সোমাব৷ ২০১৫ চনৰ ২০ হেজাৰ টকাত তেওঁ সুখী৷ ব্যক্তিজনে অনাগত ৩০ বছৰ এনে পদ্ধতিৰে চলি যাম বুলি ভাবিছে৷ এইবাৰ আমি চাওঁ ২০২৫, ২০৩৫ আৰু ২০৪৫ চনৰ ২০ হেজাৰ টকাৰ মূল্য আজিৰ দিনটোত কি হ’ব, যদিহে সমগ্ৰ সময়খিনিত গঢ়ে ৮ শতাংশ হাৰত মুদ্ৰাস্ফীতি অব্যাহত থাকিব বুলি ধৰি লওঁ৷ অংকই কয় ২০২৫ চনৰ ২০ হেজাৰ টকাৰ মূল্য আজিৰ ৯,২৬৪ টকাৰ সমান৷ ২০৩৫ চনৰ ২০ হেজাৰ টকাৰ মূল্য আজিৰ ৪,২৯১ টকাৰ সমান আৰু ২০৪৫ চনৰ ২০ হেজাৰ টকাৰ মূল্য আজিৰ ১,৯৮৭  টকাৰ সমান৷ বেলেগে আৰু কিবা ব্যাখ্যা কৰাৰ প্ৰয়োজন আছে জানো?

*****

(লেখাটো পূৰ্বে অসমীয়া প্ৰতিদিন কাকতত ১৯ মার্চ, ২০১৫ তাৰিখে প্ৰকাশ পাইছিল)